前言
今次講吓巴政有咩科讀。相信大家有聽聞講巴政係以社會科學科目而聞名。其中根據QS 2021 By-subject Ranking，巴政喺Politics and International Studies係排全球第二（官網仲要強調自己勁過Oxford） ；亦都有多位法國政治人物，包括現任法國總理馬克龍，係巴政校友，所以呢間學校本身有「法國社會精英的搖籃」之稱。所以都係嗰句，我有機會去到呢度讀書，實在係與有榮焉。
據喺巴政讀本科嘅朋友所講，巴政讀書係超級辛苦，唔好打算有「少工作量」嘅錯覺。但唔知係咪因為我哋係交換生嘅關係，去到個邊實際上要上嘅堂唔多，時間都唔長（一節課一星期都係上兩個鐘，除咗法文堂）。巴政對交換生嘅政策，我覺得係十分自由放任，因為佢並冇要求你要最少讀幾多個學分！換句話講，如果你本身讀緊嘅大學冇要求嘅話，其實讀求其揀一科嚟讀都得；但係巴政亦都設有選科上限，就係唔可以讀超過30個ECTS，而除咗Lecture course之外，其他科目，包括係Seminar course, Methodology workshop, Language course 同埋Artistic workshop 都係5 個ECTS。而根據我學校嘅計算，香港嘅大學1個學分等如2個ECTS，所以換句話講喺嗰邊最多都係讀喺香港嘅15個學分，姐係可以揀五科左右。
同香港嘅分類唔同，巴政有分唔同嘅科目嘅類型：
- Lecture course係一個大班（60–500人）聽一個教授講2個鐘書，之後會再有2個鐘類似導修課嘅堂要上，班上嘅同學亦都少好多。呢一類課目主要係引介一整個大學科（例如係政治科學、社會學、經濟學等）入面嘅一啲基本概念同框架，又或者係將跨學科嘅知識綜合教授俾學生；
- Seminar course就會係一個細班上（20–60人），入面唔同選修科都係接照大學科去分類，再探討嗰個大學科下嘅一啲議題（例如政治科學有Seminar 探討民粹與政黨政治；法律學就有同志法律等等。），形式上應該同香港一般上嘅堂差唔多；
- Methodology workshop，故名思義，就係教授社會科學方法學嘅課堂，而呢類課堂都係小班教學，一班得25個人左右；
- Language course相信都唔洗多講，不過值得一提係巴政以「國際化」自居，佢的確好鼓勵亦都提供好多外語堂俾學生揀，除咗多數大學常見嘅漢語、日文、德文、西班牙文等等，連阿拉伯文、俄文、希伯來語甚或係手語都有得讀；
- Artistic workshop就係一啲人文學嘅嘢，例如係視覺藝術、劇場以及舞蹈嘅課程。我自己就冇讀，講唔到啲乜。
（本身呢篇文應該係開學之前就打好，結果拖到而家上完三個星期堂先埋尾，lol）
我自己本身過到嚟呢邊都係打算讀多啲書，所以都用曬30個ECTS：
星期一：Qualitative Methods workshop / 5ECTS
其實個人嚟講雖然對質性研究冇咩興趣，但係都覺得呢個課程嘅內容教嘅嘢好全面：無論係由民族誌、訪談到聚焦小組以及歷史架檔，都包曬。如果有興趣，可以問我拎個課程概覽睇吓。
星期二同三：French (A1) / 5ECTS
雖然我自己唔係語言愛好者，但都揀咗法文嚟讀。一嚟，最重要嘅原因一定係，我覺得去到一個地方，真係好需要去學習吓當地嘅語言，以示尊重；就好似好多香港人都希望中国人係可以嚟到講廣東話一樣。正所謂己所不欲，勿施於人。另一個方面係，其實法文無論係使用者群，定還是全球政治影響力，都係一個好強大嘅語言。法文係全球第五多人使用嘅語言，亦都係多個國際組織例如係聯合國、歐盟等等嘅工作語言。另一方面，講到法文對於政治研究嘅幫助，法文圈都有「法文版英聯邦」：法文國家及地區國際組織（Francophonie）；而如果想了解西非同北非國家，例如係中国（一帶一路）在非洲的影響力，都需要識法文。
都想講吓呢邊學法文嘅要求。同過好多喺香港學法文嘅朋友傾過，呢邊學法文嘅要求都真係比較高：佢哋期望你學得好快。我自己本身喺香港都上咗個速成班，以及都有玩吓Duolingo，但佢第一個星期頭4個鐘已經清曬我本身學過嘅法文。例如我哋完咗第一個星期（4個鐘）就已經期望你可以做到自我介紹，同埋背到星期幾、月份同埋1至30嘅數字。
基本上我覺得呢科係我嚟到巴政最多嘢做嘅一科，因為你唔持續溫書嘅話係好難跟到個進度。
星期二同三：Comparative Politics (Lecture + Tuorial) / 10ECTS
呢科主要係教一啲好基本嘅比較政治嘅概念，例如係國家組成、民主化與威權政權、民（國）族主義、代表性等等。呢個喺巴政係一個 Lecture course，所以課時係有4個鐘，而2個鐘就會一大班人喺個大禮堂聽書，另外兩個鐘就會做匯報同討論閱讀材料。
其實我自己都幾鐘意呢科。因為一黎佢可以幫我再理清一啲我喺比較政治學上一啲知識，例如係成個領域嘅結構同埋當中嘅一啲概念。另外一點，佢分配俾我哋嘅閱讀材料真係好好睇，係有嗰種「點解冇早啲睇到呢啲嘢」嘅感覺。
同埋上導修課嘅時時候都幾搏盡吓，老師會不停問問題……但都好似有幾多同學，冇乜睇過啲材料就去上堂lol
星期三：Introduction to Econometrics with R / 5ECTS
點解讀呢科，主要係因為想再清一清啲統計學同量化研究嘅概念，另外亦都可以順便學吓R。R同Python都係一啲好常用嘅編程語言，而做量化研究用R處理會比較好。
但上堂體驗其實唔係特別好，因為一嚟老師講英文講到法文咁（唔係佢英文差，係語速快到好似請法文咁），二嚟佢塞好多嘢比較我哋：例如上堂要做一啲練習，係一教完嗰幾個語法就開始要你做個練習，根本都未吸收到，就要開始編程。所以其實最後都係自學居多。
佢哋亦都有公開個課程嘅全部內容，大家有興趣可以睇吓~
Introduction to Econometrics with R(powerpoint)
Introduction to Econometrics with R (完整教學)
星期五：Comparative Judicial Politics
呢科本身係我最期待嘅一科，但上堂體驗到頭來係好差。呢科係講喺唔同國家嘅司法覆核，點樣係唔同程度上影響嗰個國家嘅政治；有啲地方係能夠影響多啲，有啲少啲，咁樣係因為好多因素，例如係本身法官提拔方式、該國有沒有設立憲法法院、該國本身係政治體制（民主/威權；議會制/總統制）等等。
點解好想讀呢科，係因為實在係厭倦香港法官成日活喺象牙塔嘅嗰種態度；另一方面，憑我自己觀察，香港嘅法官好鐘意，有意或無意，將自己脫離於整個政治制度之外，彷彿法庭（司法）並唔係三權分立（又或者行政主導，是旦啦）下面其中一個機關。例如我哋成日聽到法官會講「我哋只基於法律觀點而非政治觀點而判案」。我本身好想透過讀呢科，學識一啲方法學同知識，有系統地去解析佢哋呢種行為。
雖然上堂體驗唔太好，但係閱讀材都幾好睇嘅~有興趣可以問持課程概覽睇吓~
總結：喺到讀書好開心
上面都有講到，本身嚟到呢間咁好嘅學校就係打算嚟專心讀書。因為一嚟喺香港實在心煩，好難集中到讀書，所以希望可以換個環境嚟試下可唔可以專心到，結果發現效果都幾好。另一方面，呢間大學始終係出名讀政治同國際國係，讀落都發現呢到嘅閱讀材料，選材方面真係好好，基本上係包含曬一個本科生對於政治學（&入面嘅分支）要了解嘅知識，幫助你之後讀上去用。
嚟緊除咗讀書以外，都好希望可以講多小小巴黎嘅生活。下一篇想寫嘅係「巴黎生存指南」，介紹下一啲巴黎生活上嘅小技巧，又或者可能會寫吓「巴黎趣事」，講吓法國/巴黎喺我呢個香港人眼中嘅搞笑嘢。
我希望可以繼續用香港人視角，同埋廣東話書寫多啲巴黎嘅嘢俾大家睇，等大家唔洗淨係睇中国人同台灣人寫嘅嘢啦~
關鍵字：法國 巴黎 巴黎政治學院 Sciences Po Paris 讀書 歐洲 exchange 交換
