到咗巴黎一個星期，都有唔少觀察同埋感想，襯而家仲記憶猶新就好快咁寫低佢：
1. 外國嘅月亮真係唔係特別圓：無論係由一開始申請簽證，定係到埗之後搞一大輪嘢，都感受到法國政府嘅行政效率真係好低；而好老實講嘅香港政府雖然已經係七孔流血，但好多運作上都比法國政府要好（我相信同其他國家比都係）。舉個例，法國政府最近推出咗打針碼。呢個打針碼比安心出行更加顛嘅係，冇打針唔俾堂食，甚至連去一啲大型商場都唔俾（有次去咗成個商場咁大嘅ikea專賣點都唔俾入）。而外國人要拎到呢個打針碼係十分之困難，一嚟本身法國政府真係比較少英文嘅官方資訊，再者法國政府啲行政方式真係令人覺得翻去十年前：根據官方現時說法，如果外國人想拎健康碼，就必須以特定格式email佢哋，並附上證明文件。你冇睇錯，係email。之後我一度以為外國人係唔可以再從藥房拎到健康碼，但後尾喺一個印度exchange口中得知佢都成功用外國疫苗證明喺藥房拎到，最後我都成功搞到了。
其實成件事真心好白痴的，一嚟點解可以惡到唔打針就唔俾堂食，二嚟點解係用email 申請……連我同啲法國本地人吹水，佢哋都話法國政府效率真係好低。
2. 巴黎地鐵比想像中乾淨安全好多：呢點都真係幾意外，唔少傳聞都話紐約同埋巴黎地鐵都好臭，好多露宿者同埋好多人乞錢兼夾偷嘢，但嚟到暫時又唔覺，反而覺得同倫敦地鐵差唔多，都算乾淨，又唔算逼，通風同電話收信號都比倫敦做得好。唔知係唔係因為我係zone1嘅關係？
3. 戴口罩令到你好似一個遊客：成日話去旅行應該盡量同當地人融合，唔應該成個「遊客格」咁樣，但呢邊令到你好似一個遊客嘅行為就係正確戴口罩。呢邊嘅人係唔興戴口罩嘅，佢哋有一個幾有趣嘅概念係，只有室內多人嘅地方先要戴口罩，室外唔洗戴。所以室外地方戴口罩嘅人係非常之少，十個有兩個左右，而其中一個係「帶」口罩；室內就一半人係「戴」一半人「帶」啦。另外我亦都留意到佢哋都唔太識正確處理口罩，基本上大家都係出咗室外之後就求其除低個口罩，亂放同摸口罩，又唔會消毒雙手咁樣。
4. 巴黎政治學院好多元、入面啲人好有目標：呢邊嘅學生會都成日會搞一啲學生聚會，我都有去過，去到主要都係同人吹水飲酒同飲酒吹水。叫得巴黎「政治」學院，入面嘅同學全部都係嚟自人文社科，例如係政治學、國際關係、經濟學等等，所以你求其搵條友都可以同佢講吓國際局勢又或者佢個國家嘅政治社會經濟情況。單單係呢幾日我都已經見咗嚟自七大洲五大洋嘅同學。除咗唔同西歐國家同英美呢啲香港人比較熟悉嘅國家之外，我仲見到啲比較冷門嘅國家嘅同學，例如係羅馬尼亞、巴西、黎巴嫩、瑞士等等……..其實仲有好多其他只係暫時冇機會遇到。
喺聚會入面我都有問吓佢哋知唔知香港嘅情況，10個入面都有8個知道香港過去發生嘅事，都算同我預想中差唔多。
另外有一樣有趣嘅嘢係我問過好多歐洲嘅學生，佢哋點睇歐盟，支唔支持脫歐。佢哋好多都話覺得歐盟整體上係好嘢，特別有兩個德國學生不約而同地講，好強調歐盟為歐洲帶嚟咗和平，係幾百年嚟都未有試過咁和平嘅局面。另外佢哋好多人都話畢咗業之後會想加入歐盟做嘢，我諗呢個亦都係點解佢哋好多人會支持歐盟？
另外更加有趣嘅係我遇到一個加泰嚟嘅學生，佢話佢都想加入歐盟工作。我問佢既然歐盟唔支持加泰獨立，點解仲要加入歐盟工作？佢都好老實答我最主要係因為人工啦，其次都覺得歐盟係一個民主機關，加入去做一啲微小嘅改變都係有可能。另外佢都有提到佢以前都係一個activist，而家都因為西班牙政府政治打壓太勁所以變得低調，專心讀書。聽到呢到我都有一啲同病相憐嘅感覺。
5. 法國人聽到英文會西面唔係都市傳說：因為我啲法文真係好屎嘅關係我冇辦法唔用英文同佢哋溝通。不過每次我講英文之前我都會先用法文同佢哋講咗「我淨係識小小法文」、「請問你識唔識英文？」先再用英文同佢哋講。每次，尤其係去到超市同一啲細啲商舖嘅時候同佢哋講英文，佢哋真係會西你面。
有一次經歷係我去藥房整打針碼嘅時候，我先同個女人講咗我巴政嘅學生、我淨係識小小法文、請問你識唔識英文，佢答oui（可以），之後就pass 咗俾個男人處理我個case，之後個男人一聽到我講英文就西咗我一下面。
其實代入翻香港人唔鐘意中国人，喺香港同你講普通話嘅情況係一樣。所以我都理解點解佢哋會咁嘅樣；另外亦都有本地學生同我講，佢哋好多人的確覺得自己嘅語言係最好，所以先希望人哋同佢哋講法文。
6. 巴黎車費好貴但好多人踩單車：相信有去過外國旅行嘅朋友都會知道外國，歐洲更加係，公共交通車費係十分之貴。喺巴黎為例，巴士同地鐵係劃一收費，搭一程要1.9euro (17hkd)，如果有時唔好彩要轉線就要再俾多1.9euro。但巴黎有樣嘢做得幾好就係佢有公共單車租用（Velib）！如果係學生平到1個月2euro左右咋！而且隨街都有站點可以借同還單車，亦都有好多人踩單車，車路亦都有為單車而設嘅路標同交通燈。其實法國政府衰還衰但佢哋係單車配套（app靚、站點多、費用平）方面真係做得好好。
呢到就係我嚟咗一星期嘅幾點觀察。希望之後可以發掘多啲巴黎同法國嘅唔同面向，同埋keep住繼續紀錄呢到嘅生活吧。
