事隔一年，再講吓六四。上年我講到我年少時對六四有認識係因為小學一位老師喺呢一日上堂播片，令到我開始對中国有一個初步嘅諗法同印象。今次講吓我對於支聯會六四晚會嘅一啲觀察。
19年係我第一次去六四支聯會晚會，亦都可能係大家最後一次去到嘅支聯會六四晚會。當時嘅我並唔係以參加者身份者去，而係以「問卷調查員」嘅身份去到會場。事實上，一直冇去支聯會晚會嘅原因，好主要都係因為身份認同同身份政治嘅原因，同同屬本土派嘅同道一樣，對「參與中国事務」並沒有太大興趣，所以往幾年都係去咗中大同港大搞嘅六四集會。點知嗰次一去，感受都幾深。
19年嘅支聯會六四晚會係喺一個比較特別嘅背景下舉行：當時整個5月，到處都係反送中嘅街站，社會上嘅政治討論十分熱烈，我亦都好記得當時嘅網路討論，有講到支聯會六四晚會嘅人數，係6月9日遊行嘅「前奏」。加上當年好似冇咩其他地方搞六四晚會，令到我對支聯會六四晚會嘅反感度亦都低咗好多。
當時我哋各調查員分配好訪問位置之後就見到群眾魚貫進場，人數愈嚟愈多，都幾誇張下，甚至去到後期連上網都上唔到；畢竟喺反送中爆發之前，香港依然係處於社運低潮，都好少見大型嘅群眾動員。
有三件事我係好深刻：
1. 場入面係有好多你一睇就知唔係香港人嘅華人嚟到會場，呢樣嘢我係始料不及，原來真係會人咁神心專登走嚟香港參與六四晚會。印象中，我訪問到一位台灣人，佢話佢除咗嚟香港參與六四晚會之外，亦都會參與69大遊行，感受吓香港嘅示威文化。
2. 我訪問嘅時候，抽中咗個高中嘅後生仔做。佢同佢父母嚟，父母講到流利廣東話但佢講唔到，應該似係讀啲國際學校出身，中產父母帶佢嚟咁樣。做問卷嘅時候，都見到佢應該唔係好知發生緊咩事，但都見到佢係幾集中同好奇嘅參與緊個集會。嗰陣我喺到諗，佢戇吓戇吓咁參與呢個集會嘅經驗，會唔會成為佢他日堅定咁追求民主嘅決心一部分呢？畢竟我覺得我自己今日嘅政治參與，唔多唔少都係因為小學老師喺堂上面播六四嘅片段，令我開始「懷疑中国」、「思考中国是怎樣嘅一回事」，亦都順應影響到我嘅政治立場同身分認同。
3. 15年本土思潮興起後，好多人都批評支聯會「行禮如儀」，每年淨係識點燭光、唱歌、搞嘉年華，令我到本來都對呢啲「儀式」好反感。但係，當我置身其中，十幾萬人一齊點燭光同唱歌，再加埋播住死難者嘅英勇犧牲片段，我承認我嘅情感都有有動搖，都有感動嘅時刻。我覺得可以用一句話去總結點解會咁多人持續咁去：「你去過就會明個氣氛係有幾洗腦」。事實上，集會嘅「儀式」，的確係好容易令人著迷其中，令到人覺得有必要每年參與。
講到尾，後國安法時代當連「愛國」支聯會都快被取締之時，我覺得今時今日再去批判支聯會過去有幾不堪都幾無意義，討論應否悼念六四更無意思：無論點爭辯，即使係用大中華定係本土角度去睇，六四必然係香港政治史中一個好重要嘅事件，係第一次引發百萬人冒住風雨上街嘅事件，係好多後來嘅人嘅政治啟蒙。正所謂Injustice anywhere is a threat to justice everywhere，當六四更加係同香港咁有關係嘅時候，我睇唔到唔悼念嘅理由。傳承真相，本身就係所有追求民主嘅人應有之義。
讓我們毋忘六四，為自由，共命運，同抗爭。
