逐點反駁
第一，呢個post引用係2013年嘅數據，十分過時。當然，質性討論嚟講，香港十年嚟嘅性別平權進程都冇乜進步過，所以數據舊還舊，都*可能*可以某程度上反映到實際情況嘅。但係，其實呢個男/女謀殺比例嘅數據表，係一直以來都有更新嘅，最新係更新到去2020年。所以咁樣引用舊數據，似乎唔係太準確。個dataset係呢到：https://dataunodc.un.org/dp-intentional-homicide-victims。
第二，就係本身數據已經係引用錯誤嘅問題。佢個post話佢係用https://www.unodc.org/documents/gsh/data/GSH2013_Sex_data.xlsx呢一個dataset（圖1），其實如果用佢引用嘅方法去解釋，其實已經有數據錯誤，世界上女人最危險嘅地方唔係香港，而係以平等進步出名嘅北歐國家 — 冰島，女人喺謀殺案中嘅比例係100%！如果用呢位作者嘅邏輯，女人去冰島真係好危險。港男唔係世界第一，冰島男先係。當然啦，港男*好似*係都係東亞/亞洲第一，勁過mirror。
第三，就係引用*只*引用一年數據呢個問題。其實呢點好簡單，我哋睇吓2012同2013年，冰島同香港嘅對比（圖2）。其實點解會出現第二點嘅情況，就係因為冰島2012年淨係得一單謀殺案，而死者係女性。如果根據作者嘅邏輯，2013年嘅冰島女人真係世一，男人謀殺案中嘅比例係100%！
第四，好啦肯定會有人質疑我拎冰島呢啲咁極端嘅例子去討論。咁我哋再拎其他國家嘅數據睇吓。圖3係香港、日本同埋印度，而呢個係謀殺案男/女死者嘅數字，
可以見到，2013年嚟講，香港女性真係好危險嘅，62單案入面有37個女人，佔謀殺案死者59.7%。但翻其他年份，除咗2017年以外，比例上都係男人比較高。而反觀女人地位一向被認為低下嘅日本，女人佔比長期都高過男人嘅；反觀同樣女權情況更差嘅印度，男人係長年佔比高啲。如果用作者嘅邏輯，以謀殺率男女比例嘅數字去定論嘅話，女人係印度嘅地位係優於男性？
第五，圖4係每100,000人中，謀殺案中男女性死者各佔嘅比例。其實可以見到香港係遠低於印度（以2017年為例，喺10萬人中，香港係死0.38個女性，而印度係死2.70個女性；印度係香港7.1倍）。
睇到呢到，我諗我都唔洗再花篇幅解釋呢個post有啲咩問題。其實仲有好多，包括質性上，唔可以假設女人被謀殺就一定係男人做；事實上我上wikipedia睇翻個命案例表，以2013年為例，當中女死者嘅數字，有部份都根本男人殺女人。有興趣睇吓呢個dataset qualitatively 嘅robustness，可以去呢到。
結語
其實一睇就知個post係亂引用數字，對比起好多西方同埋欠發達國家，香港不嬲謀殺率係非常非常低，個可比性好性。就算我同意香港女性嘅地位係有待改善，但我哋唔能夠因為某一年女死者佔謀殺案嘅比例較高，就得出「香港做女人好危險」，以後再推展到「港男世一」呢個結論。事實上，呢啲標籤化嘅行為，只會加劇男女之間嘅分化，其實更加無助性別平權。到底呢啲post係真係想促進到社會進步，定係只係作者嘅情緒發洩，我諗只有佢先最清楚。
呢個post直到我打完呢篇文喺IG上面有891個likes，而我呢篇文都未必有891個人會睇。只可以講，misinformation嘅散播速度遠比澄清快好多好多。
我覺得無論論係性別議題，定係生活上嘅大小事，真係唔好見到數據就相信。作為一個讀information science 嘅學生，data is not neutral; information is inherently biased。喺相信、like，甚至轉發之前，不妨停一停，諗一諗。
我成日都話，喺亂世中，我哋更加要慎思明辨。
