前言：點解揀法國同巴政？
一百個人有一百個揀去交換嘅地方，而我相信法國談唔上係冷門，但亦都唔會係特別多人想去，好似比較多同學揀歐洲會想去英國或者北歐四國。但點解我會揀法國，其實原因係好簡單—因為我係睇學校揀，而唔係睇國家揀。我自己讀緊間大學本身水平普通，排名對比其他大學嚟講亦比較落後，變相其他對比其他大學，選擇係比較少。而我睇曬成個列表，發現竟然有喺社會科學界都算幾出名嘅巴政揀！咁我就二話不說將兩個巴政分校（巴黎同聖特拉斯堡）嘅選項放咗喺第一同第二位。最後都好好彩揀到最想去嘅巴黎分校，仲拎埋獎學金（不過巴黎生活費真係好Q貴，之後再講）。
事實上，如果有得揀，我會比較想去英語系國家讀書，畢竟我自己一嚟好怕喺當地溝通唔到個種傍惶嘅心態，二嚟之後如果真係出去讀書都會想揀翻英語系國家嘅大學，三嚟我本來就唔係一個精通學習語言以及愛好語言嘅人，本身學習語言對我嚟講真係工具作用較多（姐係唔係要去當地我都未必會學法文）；不過今次竟然揀到巴政，就當係跳出舒適圈啦，順便感受吓歐洲文化。
而至於點解會係揀學校優先於國家，係因為我去到嗰邊都打算係讀書居所多，所以想睇吓世界上一流嘅大學佢哋課程設計、學生同老師質素係點樣。今次揀到巴政，都真係算幾好彩，而我都相信我之後都未必有機會讀得翻差唔多等級同水平嘅大學，所以必定會好好珍惜呢次機會。而事實上，最近開始揀科讀，雖然巴政貫徹住「法國人唔鐘意講英文」嘅態度，提供英文嘅課程的確比法文少，但都好吸引，有好多本身冇機會喺而家大學讀嘅嘢，以及本身有興趣探討嘅課題都讀到，而我會讀咩就之後再講啦。
準備篇：搞簽証
去交流之前最緊要嘅第一樣嘢當然係搞簽證。因為一早有聽過去過嗰邊嘅朋友講搞簽證係一樣好頭痛嘅事情，所以一放暑假就著手搞。
1. 由一開始就好似中伏？
由開始搞法國簽証嘅一刻開始，我就知道法國嘅行政程序絕對會令到香港人覺得好亂。首先，如果你搵搞法國簽證嘅中文嘅教學，絕大部分都係台灣朋友寫嘅，香港呢邊唔啱用；而如果你去搵法國官方嘅程序教學，咁通常人都會去佢哋簽證部門嘅官網搵教學，望落好似好清晰，有曬流程圖同互動式表單，教你點整：
但實際上個伏位就係呢個網站！因為簽證本身都分好多類，例如係工作、旅遊、讀書等等，而去法國讀書，首先係要去法國領事館旗下嘅Campus France 進行面試，然之後先可以再去簽證部面試同交文件，但係上面呢個官網並冇提到呢樣嘢嘅！所以如果你單靠睇上面簽證部個網站就會中伏。
當你搵到Campus France學生簽證申辦網站嘅網站嘅時候，代表你向成功申請簽證邁出一大步了！值得一讚嘅係，呢個網站嘅指引都算幾清楚，一步步教你點樣整成個簽證。
2. 指引居然係唔統一
搵到要點樣正確地申辦法國留學簽證之後，跟住佢咃嘅指引，首先係要將你喺法國讀書嘅學位名稱、法國院校、原本喺香港學校、在法修業時期同埋出發日期寄去佢哋電郵。咁看似都好清晰，點知又係一個伏位：
就係佢網站上面同埋電郵上面所要求你附註嘅資料並唔統一！佢係網站並冇叫你要填上全名（我本身署名寫咗Ken Lui）同埋你個學位嘅開學日期！雖然呢個都係極小極小嘅問題，但係後來嘅經驗話俾我聽「欠統一性」係法領嘅一個問題。
好快就收到Campus France嘅回郵，叫我去面試，亦都有提我要跟住上面個網站執好文件，指引都冇咩大問題。而喺Campus France面試嘅時候，其實你當真係純吹水，完全冇咩壓力；我自己就準備咗法文自我介紹去講，但其實成程都可以用英文講的。至於面試官問嘅問題都幾多樣，例牌會問嘅點解會揀法國同呢間學校、有咩學習計劃、有咩景點會想去之類都有問，但有趣嘅係當時都有問到而家翻緊咩工、之後嘅人生規劃係點啊、有冇諗過喺法國繼續讀書之類超出交換嘅問題都有問到。不過總之而言其實唔洗用太多時間去準備呢個面試，我聽翻好多人講其實都係非常輕鬆，當係去吹水咁。
最後有一個位想講吓嘅係，因為法領要求申請要人提供入學證明正本，但係香港同法國大學都淨係得軟本，所以法領就要求申請人要叫大學部門，電郵入學證明俾法領作核實；之後我完咗面試就電郵咗香港同法國大學部門，叫佢哋幫手。香港呢邊就即日幫我處理咗，但係法國嗰邊就玩傳波，我一開始係搵Student Services Office，然後佢覆我叫我搵Admission office，之後我再電郵Adminssion Office，佢就覆我已經將個我個案轉介咗俾 Exchange Department，然後就沒有然後了，我冇再收到過任何電郵，所以我都而家都唔知其實法國大學嗰邊有冇處理到呢個問題……都有小小無奈。
3. 搵唔到嘅表格
完咗Campus France嘅面試之後，就到去簽證部交文件了；簽證部要交嘅文件，都係同上面Campus France學生簽證申辦網站上所列嘅一樣。唯獨有一個伏位，就係「財政證明」呢部分！根據法國官方要求，學生要提供財力證明，銀行戶口每個月要有至少650歐元嘅生活費；證明可以係學生自己本身嘅銀行戶口存款，或者由其他人擔保，而由其他人擔保則要向領事館佢哋提供佢嘅稅單、你本人嘅出世紙、一份由雙方簽訂嘅同意書等等嘅文件。我本來係交咗個人銀行月結果做財力證明，但係佢哋後尾都要求以擔保人方式處理。伏位就嚟啦，就係嗰份「雙方簽訂嘅同意書」，你上網搵係搵唔到份表格嘅！我係喺佢要求我補交文件嘅電郵附夾俾我先會拎到。呢個位又係吹脹，完全唔知一開始係點樣可以用擔保人方式進行財力證明。
4. 補交文件又有伏位
啱先講到我收到領事館嘅電郵，要求我補交財力證明文件，並轉由擔保人方式處理。佢電郵入面要求我補交三樣嘢，分別係同意書、擔保人過去三個月嘅銀行月結單，以及我家長嘅身份證副本。看似都係好清晰，但其實又係有一個伏位，就係要求補交文件入面，同官網列明嘅要求唔一樣，並冇要求你提供擔保人嘅稅單同埋出世紙證明。呢個位又再一次反映佢哋行政程序上嘅欠統一性。
我當時都奇怪點解唔冇叫我帶埋出世紙同稅單去補交，而由於我申請唔切屋企人英文版嘅稅單，所以我最後淨係帶咗佢要求嘅文件，同埋出世紙。去到補交嘅時候，職員同我講，大意就係通常佢哋都要求申請人提供出世紙，但唔知係咪佢哋人手而唔係系統處理電郵嘅問題，所以冇叫我帶埋出世紙補交。之後我就即刻拎咗出世紙俾佢。好彩有帶到出世紙！唔係好大機會又要去多一次領事館！事實證明佢哋嘅行政系統真係有啲混亂！
***順帶一提，大家去搞簽證嘅時候，記得要將Campus France網站所列出文件，以順序方式排好，我見上網有人咁教，亦都事實上交文件俾職員檢查嘅時候會慳好多時間。
小結：由準備過程就已經係一種文化體驗
由揀學校開始就覺得今趟旅程會係一個好好嘅文化體驗，而申請簽證就令到我了解到一啲地方嘅官僚系統的確未必咁有效率。我自己申請過美國簽證同埋填過入境澳洲嘅表格，都真係比較清晰；而我覺得今次呢個位係唔關語言事，而係實實在在一個行政系統落後。
啱啱收到通知，租約已經簽好，姐係唔洗瞓街了~而聽日亦都會揀科，等到有揀科時間表，同埋簽證出咗之後，再同大家分享吓吧。
— — — — — —
關鍵字：法國 Exchange 簽證 Science Po Paris 巴黎政治學院
